2026-шы иэш бюджетӹм пингӹдемдӹмӹ

Конгрессвлӓн Дворцӹштӹ Мары Элӹн Государственный Собранин кӓндӓкшӹмшӹ созывын бюджетный сессижӹ эртӓрӓлтӹн.

Регионын парламентӹн заседаништӹ республикӹн Глава Юрий Зайцев, Федераци Совет председательӹн заместитель Константин Косачев дӓ Федераци Советӹн Оборона дӓ безопасность комитетӹн пӹтӓришӹ заместитель Сергей Мартынов участвуенӹт.

Промышленность, экономический виӓнгмӓш дӓ торговльын министр Владимир Халюзин регионын анзыкылашы кым иэш социальноэкономический виӓнгмӹ корныжым пӓлемден.

«Макроэкономический йӧнвлӓм шотышкы нӓлӹн, социально-экономический виӓнгмӓш 2026 ин икладын кеӓш тӹнгӓлмӹлӓн ӹнянӹмӹлӓ. 2027 – 2028 ивлӓн пӹсӹн кемӓш пӓлдӹрнӓш тӹнгӓлшӓшлык», – министр манын.

Тидӹлӓн социально-экономический виӓнгмӓшӹн индивидуальный программа палшышашлык, а тидӹлӓнжӹ кычыкым анзылны кешӹ отрасльвлӓ, тенгеок туризм, сола аграривлӓ, изи дӓ икпоратка бизнес пуат лиэш. Промышленный производство и йӹде 3,5% кушшашлык, а сола хозяйствын продукци –1,2% рӓдӹ.

Правительство Председательӹн Заместитель – финансвлӓн министр Алексей Торощин Мары Эл Республикӹн республиканский бюджетӹн проектӹм 2026 дӓ 2027 – 2028-шӹ ивлӓэш ланзылаш шайышт пуэн.

«Республикӹн бюджетӹн социальный монгыржы 70,9 процентӹм йӓшнӓ, тишкӹ СВО-н участник дон семнявлӓштӹлӓн палшымашат пыра. Сек пӹтӓришӹ вӓрӹштӹ – национальный проектвлӓм ӹштен шоктымаш», - министр манын.

Бюджетӹн доходшы 2026 иэш 73,2 млрд тӓнгӓ погынышашлык, шӓвӹмӓшӹжӹ – 76,5 млрд. тӓнгӓ.

Шукым сола хозяйствывлӓлӓн, транспорт комплекслӓн дӓ изи дон икпоратка бизнеслӓн палшаш пуаш айырымы, муниципалитетвлӓлӓн – 22,1 млрд. тӓнгӓ. 30 утла инвестиционный проектӹм ӹлӹмӓшкӹ пырташ 1,7 млрд тӓнгӓм пумы лиэш. Бюджет гӹц пасна 2 млрд утла тӓнгӓ пырышашлык. Аграри дон сола продукцим ӹштӓш кым и лошты 2,6 млрд тӓнгӓм пумы лишӓшлык.

Госсобранин депутатвлӓ бюджет доно келшенӹт, тӹдӹ 1 январь 2026 ин ӹлӹмӓшкӹ пыраш тӹнгӓлеш.

Мары Эл Республика Главан Администрацин пресс-службын отдел. «Жерӓ» №49 (10977), 12 декабрь 2025 ин.