АПК-м виӓнгдӓш – шулыкан эдемвлӓ
Мары Элӹштӹ Приволжский федеральный округын законодательвлӓн Советӹн пленарный заседанижӹм эртӓрӹмӹ.
Заседанин тӹнг ядмашвлӓжӹ агропромышленный комплексӹм виӓнгдӹмӹ дӓ здравоохранени системым кадрвлӓ доно ситӓрӹмӹ гишӓн ылыныт.
ПФО-шты РФ Президентӹн полпредӹм вашталтышы Игорь Буренков АПК-м виӓнгдӹмӓш дӓ медицинский палшыкын пӹсӹжӹ пиш цат кӹлдӓлтӹнӹт манын. Тӹдӹ Россий Президент Владимир Путинӹн 2030 и яктешӹ национальный цельӹм келесӹмӹжӹм ӓшӹндӓрен пуэн: производствым лӱктӹмӓш дӓ сельхозпродукцим тӱ сӓндӓлӹквлӓшкӹ колтымаш.
«Ти ивлӓ лошты агропромышленный комплекс ПФОшты пӹсӹн виӓнгеш, тенге продовольственный безопасность ӹштӓлтеш дӓ миллионвлӓ доно эдемвлӓн ӹлӹмӓш яжоэмеш. Тидӹн негӹцӹштӹжӹ – у технологивлӓм кычылтмаш, пӓшӓ пӹсӹн кеӓ, ӹлӹмӓш кӓньӹлрӓк лиэш», – Игорь Буренков пӓлемден.
«Мары Элӹштӹ тенгеок экономикӹн цилӓ отрасльжы виӓнгеш, духовно-нравственный пайдалык перегӓлтеш, патриотвлӓэш тымден куштымылан йӧнвлӓ улы, историн тӧрӹм дӓ молымат перегӹмӓш видӓлтеш. Вет регионышты шукы ивлӓ мычкы законодательный дон исполнительный власть, вӓрвлӓштӹшӹ самоуправлени лошты икышын пӓшӓлӹмӓш ылеш, тидӹ республикӹштӹ кымда виӓнгмӓшкӹ шоктен, политический, социальный дӓ экономический ситуаци икладын кеӓ», – регионын Глава манын.
Пленарный сессиштӹ Мары Элӹн Государственный Собранин Председатель Михаил Васютин дӓ республикӹн сола хозяйство дон продовольствин министр Павел Раевский ПФО-шты дӓ регионышты агропромышленный комплексӹн кыце виӓнгмӹжӹ гишӓн шайыштыныт.
Сола хозяйство республикӹн дӓ ПФО-н экономикӹштӹжӹ тӹнг вӓрӹм йӓшнӓ. Мары Элӹн экономикӹштӹ АПК-н пӓшӓн лӓктӹшӹжӹ 13,6 % ӹштӓ. Республика ПФО-н дӓ Российӹн регионвлӓ лошты сола хозяйствын сферӹштӹ анзылны икманяр показатель доно ылеш дӓ эче виӓнгӓш вӓржӹ улы.
Мары Элӹштӹ агробизнеслӓн палшаш кок виӓн йӧн улы – у национальный проектвлӓ дӓ республикӹн социально-экономический виӓнгмӓшӹн индивидуальный программа
Ядмашвлӓм решӹмӓшӹм цымырын анжымаш, керӓл у законвлӓм пыртымаш агропромышленный комплексӹм дӓ солаштышы ӹлӹмӓшӹм пакыла виӓнгдӓш палшышашлык ылыт. Шамак толшеш, 2021 и годшен «Земский доктор» дӓ «Земский фельдшер» программывлӓ велдӹк солавлӓштӹ медицина кадрвлӓн шот 13% шукемӹн.
Законодательвлӓ пӹтӓртӹшеш тӹнг задачывлӓм икманяр иэш анзыкыла пӓлемденӹт: такеш кишӹ мӱлӓндӹм кычылтмаш, техникӹн паркым уэмдӹмӓш, ӹшкӹмӹн вырлыкаш дӓ генетический материалым кычылтмаш, селекцим виӓнгдӹмӓш, производствым модернизаци дон цифровизацишкӹ ваштымаш.
Мары Эл Республика Главан Администрацин пресс-службын отдел. «Жерӓ» №17 (10996), 24 апрель 2026 ин.