«Артек» лагерьӹштӹ – «Гусли Победы» торжественный концерт

Концертӹм Мары Эл Республикӹн Глава Юрий Зайцев дӓ «Артек» Международный тетя центрӹн директор Константин Федоренко пачыныт.

Регионын Глава концертӹн цилӓ участникӹм лӹмлӹ датывлӓ доно кымылангден, Мары Элӹн кечӹвлӓ цилӓлӓн йӓнг семеш ылмылан ӹнянӹмӓшӹм пӓлемден.

«Мӓмнӓн регионым тишкӹ ӱжмӹлӓндӓ дӓ мӱлӓндӹнӓм, кыды шӹргӹ, йӓрвлӓ доно паян, пӓлӹмӹм ӹштӓш йӧнӹм пумыланда тау. Мӓ тӓмдӓм Мары Элӹшкӹнӓ ӱжӹнӓ. Тӓмдӓм кого событивлӓ доно кымылангдем. Артековец тагачы, артековец соэшок!» – Юрий Зайцев манын.

Вӓшештӹмӹ годым Константин Федоренко республикӹлӓн яжо программым йӓмдӹлӹмӹ гишӓн таум келесен.

«Мӓ «Артек» сменӹвлӓн кым тӹжем нӓрӹ эдемлӓн Мары Элӹн анзылтымаш дон цевержӹм анжыктымы гишӓн таум келесенӓ. Республикӹм 105 и теммӹжӹ доно кымылангденӓ», - «Артек» центрӹн директоржы манын.

Юрий Зайцев центрӹн музейлӓн Мары Элӹн символжым – мары кӓршӹм – подарен. Халыкын яратымы дӓ шотеш пиштӹмӹ инструментлӓн 2019 ин патентӹм национальный бренд семӹнь пумы.

Ӹнде шергӓкӓн подарка семӹнь «Артек» лагерьӹштӹ шотеш пиштӹмӹ вӓрӹм йӓшнӓш тӹнгӓлеш.

«Гусли Победы» музыкальный программа Павел Тойдемарын концерт бригадым ӓштӹмӹ лӹмеш ылеш. Мары государственный филармонин артиствлӓ гӹц 1941 ин бригадым погымы, вара нӹнӹ 1160 концертӹм вырсы лошты Якшар Армин салтаквлӓлӓн анжыктенӹт.

«Артек» лагерьӹн сценӹштӹ «Марий Эл» Государственный ансамбль, «Чинчывий» кӓрш ансамбль, Э.Сапаев лӹмӓн Мары государственный опера дӓ балет академический театрын солиствлӓ, «Тулгайык» халык мыры ансамбль дӓ талантан молы артиствлӓ выступаенӹт.

Мары Эл Республика Главан Администрацин пресс-службын отдел. «Жерӓ» №44 (10972), 7 ноябрь 2025 ин.