Автодорожный техникум – транспорт дӓ корны отрасльлан

Тиштӹ каждый выпускник тӹнг специальность гӹц пасна эче кок-кым профессиэш тымень лӓктеш.

Стажировкым эртӓш дӓ пакыла пӓшӓшкӹ пыраш 31 предприяти доно хытырен келшӹмӹ, документеш кидӹм пиштӹмӹ.

«Молодежь и дети» национальный проектӹн «Профессионалитет» федеральный проект негӹцеш тыменьмӹ дӓ ӹлӹмӹ вӓрвлӓм уэмден тӧрлӹмӹ. Тидӹлӓн 123 млн. тӓнгӓм пумы, 18,4 млн тӓнгӓм – общежитим тӧрлӓш.

2025 ин техникум 100 млн. тӓнгӓм федеральный бюджет гӹц, 15 млн тӓнгӓм регионын бюджет гӹц кычылтын, 31 млн. тӓнгӓм партнер организацивлӓ пуэнӹт. Тишӓкен тренажервлӓм, нелӹ дӓ грузовой куд техникӹм, оборудованивлӓм, инструментвлӓм, виртуальный лабораторивлӓм нӓлмӹ.

Мары Эл Республикӹн Глава Юрий Зайцев уэмдӹмӹ Автодорожный техникумым анжен лӓктӹн, студент дон педагогвлӓ доно шайыштын.

Республикӹн Глава автодорожный техникумым республикӹн предприятивлӓлӓн кӹзӹтшӹ жеплӓн ярал «кузница кадров» манын.

«Ӹнде студентвлӓлӓн тыменяш кымыл яжорак ылеш, тенге йӹмдӹлӓлтмӹ паштек пӓшӓ вӓрӹмӓт моаш куштылгырак лиэш», - Юрий Зайцев манын.

Техникумын директор Ольга Ильина Мары Элӹн Главалан таум келесен.

1977 ин пачмы Автодорожный техникум республикӹн отрасльвлӓлӓн пиш керӓл. Тиштӹ «Профессионалы» Чемпионатын региональный этапшы кым компетенци доно эртӓрӓлтӹн: «Управление бульдозером», «Управление экскаватором» дӓ «Обслуживание грузовой техники».

Техникум негӹцеш и йӹде 500 утла эдем профессиональный пӓлӹмӓшӹм получая дӓ вес пачаш у семӹнь тыменеш.

Мары Эл Республика Главан Администрацин пресс-службын отдел. «Жерӓ» №9 (10988), 27 февраль 2026 ин.