Государственный национальный политикӹн концепцим ӹлӹмӓшкӹ пыртымым Мары Элӹштӹ раскыдемденӹт
Республикӹн Глава Юрий Зайцев ти тема доно Правительственный комиссин заседаним эртӓрен.
Регионын Глава ӓшӹндӓрен пуэн: 25 ноябрьын 2025 ин Российӹн Президент Владимир Путин государственный национальный политикӹн 2036-шы и якте пӓлемдӹмӹ стратегим пингӹдемден. Ти документӹн цельжӹ: российский обществышты икышын ӹлӹмӓш лижӹ дӓ национальностьвлӓ лошты кӹрмӓшӹмӓш лимӹм чӹдемдӹмӓш.
«Концепцин керӓлжӹ тӹнӓм веле пӓлдӹрнӓш тӹнгӓлеш, кынам икышын пӓшӓлӹмӓш исполнительный властьын органвлӓ, местный самоуправленин органвлӓ, общественный организацивлӓ, научный сообщество дӓ молы цилӓ эдем лошты лиэш. Иквӓреш ушнен веле мӓ виӓн, цымыр дӓ яжо государствым ӹштен кердӹнӓ», - Юрий Зайцев пӓлемден.
Заседаништӹ тенгеок тӱ сӓндӓлӹквлӓ гӹц толшы эдемвлӓ дӓ махань-шон общинывлӓ доно иквӓреш пӓшӓм ӹштӹмӹ гишӓн, нӹнӹм мӓ донна йӹгӹре ӹлӓш тымдымы гишӓн хытырымы.
Мары Эл Республикӹштӹ кӹзӹт шукы йиш халыквлӓ лоштышы кӹл пингӹдӹ ылеш. Миграционный учетышты кӹзӹт шӹм тӹжем нӓрӹ тӱ сӓндӓлӹквлӓн эдемвлӓ ылыт: тӹнг шотышты Инди, Узбекистан, Таджикистан, Азербайджан, Беларуси, Туркменистан гӹц. Шукынжы тыменяш дӓ пӓшӓм ӹштӓш толыныт
Республикӹштӹ 5 этнический диаспора улы, кышты иквӓрешӹжӹ 1,5 тӹжем нӓрӹ эдем. Этнический группывлӓ ӹшке лоштышты толерантностьым яжон кычат. Тӱ сӓндӓлӹк гӹц толшы эдемвлӓ лошты правонарушени ӹнжӹ ли манын, план семӹнь пӓшӓ ӹштӓлтеш.
Правительство Председательӹн Заместитель – культура, печать дӓ национальность пӓшӓ шотышты Мары Эл Республикӹн министр Константин Иванов тӱ сӓндӓлӹквлӓн гражданвлӓ мӓмнӓн ӹлӹмӓш доно ушнышты манын, икманяр йӧн гишӓн увертӓрен.
12 сентябрьын 2025 ин Сӓмӹрӹквлӓн дворецӹштӹ Келшӹмӓш Международный клубым пачмы. Тӹжемӓк-пелӓк иностранный студент махань-шон мероприятивлӓштӹ участвуен: «Лингва-территория» йӹлмӹвлӓн фестиваль, «Единство в дружбе» национальный культурывлӓн Сӓмӹрӹквлӓн фестиваль дӓ молат.
2025 ин 3-шы кварталым иктешлӹмӹ семӹнь республика 6-шы вӓрӹштӹ «Доля иностранных граждан, охваченных мероприятиями по содействию их адаптации в Российской Федерации» показатель доно ылеш.
Мары Эл Республика Главан Администрацин пресс-службын отдел. «Жерӓ» №48 (10976), 5 декабрь 2025 ин.