Йӓнг пачын хытырымаш

Кырык мары районын Сӓмӹрӹквлӓн парламент улы, кыдым районын депутатвлӓн Собрани сага айырымы дӓ общественный организаци ылеш. Тӹдӹ районын политический ӹлӹмӓштӹжӹ участвуя, сагажы сӓмӹрӹк ӹдӹр-ӹрвезӹвлӓм уша, керӓл шанымашвлӓштӹм власть якте шокта, интересӹштӹм шотышкы нӓлеш, общественный пӓшӓшкӹ цымыра, кӓнӹмӹ жепӹштӹм эртӓрӓш палша.

Сӓмӹрӹквлӓн парламентӹн вуйлатышыжы – председательжӹ – Роман Ермаков, тенгеок Мары Эл Республикӹн Сӓмӹрӹквлӓн парламентӹн национальный политика дӓ культурывлӓ лоштышы кӹл комитетӹн членжӹ ылеш. Тӹдӹ общепит сферӹштӹ индивидуальный предприниматель, пуры шанымаш доно общественный пӓшӓшкӹ тагынамок ушнен. Сӓмӹрӹк эдем йӹржӹ ӹшкежӹ ганьок шанымашан виӓн командым поген миӓ дӓ махань-шон проектвлӓ палшымы доно туан районжым анзыкыла виӓнгдӹнежӹ.

Техень ик проектӹн тӹнгӓлтӹшӹм ӹштӓш 14 декабрьын «Юла» лӹм доно клуб семӹнь ик вӓшлимӓшкӹ погенӹт.

Юла (йы́ла-ма?, и.п.) – тоштемшӹ шамак (устаревшее), рушлажы «обычай, верование, быт» «А.А.Саваткован Словарь горномарийского языка.–Йошкар-Ола: Марийское книжное издательство, 2008» семӹнь ынгылдарымы.

Вӓшлимӓшӹм ти йӧн доно погаш шанымашым парламентӹн членжӹ Полина Потокова пуэн. Сӓмӹрӹк ӹдӹр Виловат солашты шачын, ӹндекш класс тӹштӹ кӹдӓлӓш школышты тыменьӹн, «Движение первых» общественный пӓшӓн пӹсӹ тыменьшӹжӹ ылын, а кӹзӹт Козьмодемьянскышты «Дарование» школ-интернатышты пакыла тыменеш. Общественный пӓшӓ тӹдӹлӓн пиш ярал ылеш, седӹндон сӓмӹрӹквлӓн форум, слетвлӓштӹ участвуя.

Рушӓрнян, кӓнӹмӹ кечӹн, Я.Эшпай лӹмӓн Халык культура центрӹн ик яжо залыштыжы эртӓрӹмӹ пӹтӓришӹ вӓшлимӓштӹ сӓмӹрӹквлӓ туан Кырык сир, кырык мары халыкын традицивлӓжӹ, йӹлмӹжӹ дӓ нӹнӹм переген кодымы йӧнвлӓ гишӓн хытыренӹт. Парламентӹн составыштыжы ылшы сӓмӹрӹквлӓ гӹц пасна школын ик тыменьшӹ, вузын ик студент, молывлӓ ылыныт.

«Юла» клубын пӓлемдӹмӹ темыжы доно хытырымашкы «Жерӓ» газетӹн корреспондент, редакторын заместительжӹ С.В.Ильина ӱжмӹ ылын. «Йӹргешкӹ стӧл» йӧн доно эртӓрӹмӹ мероприяти цилӓлӓн яралеш лӓктӹн, пӓлӹмӓшӹм дӓ ынгылымашым кымдаэмден. Икань шанымашан эдемвлӓ йӓнг пачын хытыренӹт, туан йӹлмӹ доно сирӹмӹ книгӓ дон журналвлӓм анжалыныт, юкынат лыдыныт.

Пӹтӓртӹшеш у вӓшлимӓшӹн темыжым дӓ вӓржӹм пӓлемденӹт.

В.СИЛИНА. «Жерӓ» №50 (10978), 19 декабрь 2025 ин.