Йошкар-Олашты «Мары кӓнгӹж» («Марийское лето») и йӹде ӧлицӓштӹ эртӓрӹмӹ V фестиваль пачылтын

Мары Эл Республикӹн Глава Юрий Зайцевӹн шанымаш доно эртӓрӓш тӹнгӓлмӹ фестиваль 1 июнь гӹц 31 август якте шыпшылтеш.

Кыце шукы гӓнӓ регионын Глава пӓлемден, тӹдӹн цельжӹ – иктӓ-махань событи доно кӹлдӓлтшӹ туризмӹм виӓнгдӹмӓш, республикӹштӹ ӹлӹшӹ дон хынавлӓм иквӓреш ушымаш дӓ Мары Элӹн ӹшке йишлӓ ылшы культура дӓ традицивлӓжӹ доно пӓлдӓрӹмӓш.

«Тетявлӓм перегӹмӹ мир вӹлнӹшӹ кечӹн тӹнгӓлӓлтмӹжӹ пиш толкеш толеш. 1 июнь – тидӹ каникул кечӹвлӓн шомы веле агыл, а тенгеок мӓлӓннӓ тетявлӓ верц ответственность коговлӓ вӹлнӹ ылмым ӓшӹндӓрен келесӹмӓш ылеш. 2022 и годшен фестиваль шот кок гӓнӓ, а участник шот кым гӓнӓ шукеммӓш сусуэмдӓ», – Юрий Зайцев манын.

Фестиваль халан 50 площадкышты эртӓрӓлтӓш тӹнгӓлеш: ӹрдӹ площадьышты, бульварышты, культурын учрежденивлӓ анзылны дӓ т.м. Когарня, кукшыгечӹ дӓ рушӓрня йӹде махань-шон мероприятивлӓ лит, а изӓрнян кудывичӹвлӓштӹ – «Марийское лето с Движением Первых» акци.

12 июньын Царьградский площадьышты – вокально-инструментальный ансамбльвлӓн Межрегиональный молодежный дӓ «ЭтоСем» рок-группын этнофестиваль. Мары паркышты 27 июнь гӹц 29 август якте кукшыгечӹ йӹде республикӹн районвлӓ гӹц творческий коллективвлӓн концертвлӓ лит.

Культура дӓ кӓнӹмӹ Центральный парк сек активный вӓр лиэш, кышты празныквлӓ, театрализованный программывлӓ, «МузЙОпарК» кӓнӹмӹ вады, ретро-дискотекывлӓ, кином анжыктымаш дӓ «И вальс, и танго, и фокстрот» духовой оркестр семеш куштымашвлӓ.

Патриарший площадьышты республикӹн фольклорный ансамбль дон творческий коллективвлӓн концертвлӓм анжаш лиэш. Чавайнлан бульварышты декоративно-прикладной творчествын мастарвлӓн выставка дӓ ӧлицӓштӹ шактышывлӓн выступленивлӓ лит.

Республикӹн дӓ Пресвятой Дева Мариян площадьвлӓштӹ концертно-развлекательный программывлӓ, спортивный мероприятивлӓ дӓ мастер-классвлӓ эртӓрӓлтӹт.

Мары Эл Республика Главан Администрацин пресс-службын отдел. «Жерӓ» №24 (11003), 11 июнь 2026 ин.