Йошкар-Олашты «Наставничество. Поиск» поисковикнаставниквлӓн IV Всероссийский слет эртӓрӓлтӹн

Кого мероприяти поисковый объединенивлӓн Российӹн 26 регион гӹц 120 представительӹм цымырен ылын. Слетышты регионын Глава участвуен, кӹчӓлмӹ пӓшӓм ӹштӹшӹ отрядвлӓн керӓлӹштӹм пӓлемден.

«Поисковый движени историм пӓлӹмӓштӹ дӓ патриот семӹнь куштымашты кого вӓрӹм йӓшнӓ. Тӓмдӓн пӓшӓдӓ – тидӹ первишӹ дон анзыкылашым ушышы кӹвер, каждый экспедицидӓ Шачмы мӱлӓндӹлӓн ӹнян ылмыдам анжыкта. Маршал Георгий Константинович Жуков манын: «Иктӓт мондалтде дӓ нимат мондалтде» («Никто не забыт и ничто не забыто») – ти шамаквлӓ Кого Отечественный вырсым мондыдымынам анжыктат. Момы каждый медаль, фамилим пӓлен нӓлмӓш – тидӹ веремӓм дӓ мондымашым сӹнгӹмӓш».

Регионын Глава Мары Элӹн кӹчӓлшӹ отрядвлӓн шукы пӓшӓм ӹштӹмӹ гишӓн мактен: республикӹштӹ дӓ тӹдӹн ӧрдӹжтӹ кӹчӓлмӹ годым таманяр лу экспедицим эртӓрӹмӹ, сӹнгӹмӓш верц кредӓлшӹ салтаквлӓн лӹмӹштӹм момы, школвлӓн музейвлӓшкӹ вырсын лачокшы хӓдӹрвлӓм пумы.

«Кӹчӓлмӹ пӓшӓ кӹзӹт айыртемӹн керӓл ылеш, кынам историм йори алтален вашталташ цацат, советский халыкын Кого Сӹнгӹмӓшӹжӹм ӹнештӹ пӓлдӹртеп. Мӓмнӓн задачына – коготьотянавлӓн патыр дон лӱддӹмӹштӹм сӓмӹрӹк йыхлан тӧр ынгылдараш. Ти слет тек сек керӓл площадка лиэш, кышты келшен ӹлӹмӓш цаткыдемеш», – Юрий Зайцев манын.

Тенгеок пӓшӓ доно вӓшлимӓш Мары Элӹн Глава дӓ Госдумын депутат, Госдумын комитетӹн «Поисковое движение России» Общероссийский общественный движенин ответственный секретарь Елена Цунаева доно эртӓрӓлтӹн. Тӹдӹ республикӹштӹ Отечествым перегӹмӹ годым колышывлӓн лӹмӹштӹм перегӓш манын поисковиквлӓ Федеральный закон семӹнь цилӓ йӧнӹм кычылтыт манын.

Слетым «Поисковое движение России» общественный движени дӓ Мары Элӹн Правительство цымыренӹт, кыды «Регион для молодых» программа семӹнь эртӓрӓлтӹн.

Кым кечӹ лошты участниквлӓ кого программа семӹнь шукы ядмашым раскыдемденӹт.

Мары Эл Республика Главан Администрацин пресс-службын отдел. «Жерӓ» №13 (10992), 27 март 2026 ин.