Изи солавлӓн 27 пӧртӹштӹ газ тыл чӱктӓлтӹн

2025 ин Кырык мары районышты солавлӓн догазификаци программым пакыла виӓнгдӹмӹ. Догазификацим ӹштен шокташ манын, изи солавлӓм газан ылшы когорак сола доно ушымы дӓ тӹдӹ ӧлицӓжӹ лин колтен: тенге Виловат сола кымдемӹштӹ Шактенваж солам Кожваж солашкы ушымы, Пӹзӹкныр сола кымдемӹштӹ Этюксола дон Изи Йылйӓл (Наумово) солавлӓм ушымы, Йоласал кымдемӹштӹ – Песерал солам Йоласал доно. Ти тема доно «Газпром газораспределение Йошкар-Ола» ООО-н Козьмодемьянск хала филиалын директор Михаил Родионов ынгылдарен.

Ти пӓшӓм мычаш якте шокташ манын, куд километр нӓрӹ газ трубам шыпшмы дӓ кым газорегуляторный пунктым ӹштӹмӹ. Пӹтӓришӹ 27 пӧртӹшкӹ газым пумы дӓ угӹцӓт ядмашвлӓм пуаш лиэш. Пӓшӓм кӓнгӹжеш веле пӹтӓрен шоктымыла ылын, но ирӹрӓк шоктымы: телӹм газ лач керӓлеш толеш.

Михаил Родионов тенгеок догазификаци Эмӓнсола кымдемӹштӹ лишӓшлык манын, вет 2025 ин Изи Пистерлӓ солам Лыксолан ӧлицӓэш шотлымы, тенгеок Пайскырык кымдемӹштӹ Алатай, Кӓрмӓнер дӓ Лидӹвуй солавлӓм ушымы.

Тидӹм пӓлемдӹмӹлӓ: Мары Элӹн Глава Юрий Зайцев эдемвлӓн ӹлӹмӹ йӧнвлӓштӹм яжоэмдӹмӹ верц айыртемӹн шытырлана: «Республика пакылаат каждый солашкы цивилизацин яжожы пырымы верц пӓшӓлӓш тӹнгӓлеш».

Ӓшӹндӓрен пуэнӓ: догазификаци – ӧлицӓ мычкы кешӹ трубам пӧрт якте шыпшын пумаш. Ти пӓшӓ гишӓн шытырым государство ӹшке вӹкӹжӹ нӓлеш, тома хоза пӧрт кӧргӹштӹшӹ пӓшӓ верц дӓ оборудованим нӓлшӓшлык. Ти программылан тӹнгӓлтӹшӹм Россий Президент ӹштен. 2021 ин тӹдӹ техень задачым Федеральный Собранилӓн келесӹмӹ шаяштыжы ӹштен: солашты томавлӓ газ доно ситӓрӹмӹ лишӓшлык ылыт.

Догазификаци – тидӹ рок лоштышы пыч веле агыл. Тидӹ россиянвлӓн ӹлӹмӓшӹштӹм яжоэмдӹмӹ проект!

В.ЁЛКИН, С.ИЛЬИНА. «Жерӓ» №4 (10983), 23 январь 2025 ин.