Корнывлӓштӹ авари чӹдӹрӓк лимӹ гишӓн

Мары Элӹн Глава совещаним эртӓрен, кышты корнывлӓштӹ аваривлӓ лимӹ дӓ нӹнӹм чӹдемдӹмӹ гишӓн шайыштыныт.

Тӹштӹ шаям кыченӹт: МВД Госавтоинспекцин региональный управлени начальникӹн врио Андрей Шабалин, Мары Эл Республикӹн образовани дӓ наукын министр Лариса Ревуцкая дӓ регионын транспорт дӓ корны хозяйствын министр Александр Герасименко.

Республикӹн Глава корнывлӓштӹ авари ӹнжӹ ли манын, профилактика пӓшӓм яжоракын ӹштӓш задачым шӹнден.

«Пӹтӓртӹш жепӹн ДТПшты колышы эдем шот 18,2% чӹдемӹн, но соиктокат авари лимӓш тыргыжландара. Цилӓлӓн корнышты лӱдмӓш ӹнжӹ ли, айыртемӹнок тетявлӓлӓн», - Юрий Зайцев манын.

Андрей Шабалин Министерствышты ик группым ӹштӹмӹ гишӓн келесен, кыды ДТП-н виржӹм тӹшлӓ. Тенгеок тӹдӹ ДТП кышты шукырак гӓнӓ лимӹ вӓрӹм шотышкы нӓлеш, тидӹлӓн 33 мероприятим (кыдалыштмаш кыце кеӓ, скорость маханьы, кыдал эртӹмӹм анжымаш, светофорын йылымыжы дӓ т.м.) ӹштӹмӹ манын. Ти и пӹтӹмешкӹ ӹндекш вӓре солавлӓ мычкы кешӹ корным сотемдӓрӓш планышты ылеш (22 км).

Мтинистр Лариса Ревуцкая «Лаборатория безопасности» профилактика, «родительские патрули», и йӹде «Безопасное колесо» сӓмӹрӹк инспекторвлӓн республика кӱкшӹцӓш конкурс эртӓрӓлтеш манын. «Инфраструктура для жизни» национальный проектӹн «Безопасность дорожного движения» региональный проект негӹцеш выргемеш тышкышашлык сотемдӓрӹшӹ хӓдӹрвлӓм тене 100% лӱктӓлмӹ, седӹндон тидӹ 25 тӹжем эдемлӓн ситӹшӓшлык манын.

Министр Александр Герасименко тене «Безопасность дорожного движения» региональный проект семӹнь корным сотемдӓрӓш дӓ тротуарым ӹштӓш корны фонд гӹц 200 млн тӓнгӓм пумы гишӓн келесен.

Пӹтӓртӹшеш Юрий Зайцев пӓлемден: «Корнывлӓштӹ авари лимӹ ваштареш кредӓлмӓш – тидӹ цилӓн иквӓреш ӹштӹшӓшлык задача: властьын, Госавтоинспекцин, образовательный учрежденивлӓн, общественный организаци дон каждый гражданинӹн».

Мары Эл Республика Главан Администрацин пресс-службын отдел. «Жерӓ» №43 (10971), 31 октябрь 2025 ин.