Мары Элӹн Глава – Госсоветӹн заседаништӹ

Москвашты Российӹн Президент Владимир Путинӹн вуйлатымы доно Государственный Советӹн заседани ылын, кыдым Россий Федерацин экономикӹлӓн кадрвлӓм йӓмдӹлӹмӹ ядмашвлӓлӓн эртӓрӹмӹ.

Заседаништӹ Россий Правительство Председательӹн заместительвлӓ, регионвлӓн губернатор дон глававлӓ, бизнес дон общественный организацивлӓн представительвлӓ ылыныт.

Тӹштӹ айыртемӹнок кадрвлӓм ситӓрӹмӓш, искусственный интеллект технологивлӓм виӓнгдӹмӓш дӓ образовани системӹм тӹдӹлӓн келӹштӓрӹмӓш, дополнительный профессиональный образовани системӹштӹ вашталтмашвлӓм ӹштӹмӓш, кадрвлӓм ситӓрӓмӓштӹ работодательӹн рольжы гишӓн хытыренӹт.

Российӹн Президент выступленижӹ годым профессиональный образовани системӹштӹ тымдымашым яжоэмдӹмӹ, колледж, техникум, вузвлӓн выпускниквлӓм пӓшӓшкӹ нӓлӹн мыштымашым лӱктӓлӓш келеш манын.

«Профориентацин инфраструктурым сӓмӹрӹквлӓ лошты шӓрӹмӓш пиш керӓл ылеш. Кыды-тидӹ регионышты нӹнӹлӓн кадрвлӓм йӓмдӹлӹмӹ центрвлӓм ӹштӹмӹ. Тӹштӹ сӓмӹрӹквлӓлӓн профессим айыраш тымдат дӓ пӓшӓ вӓр якте корным ажед пуат. Тидӹм молыланат шотышкы нӓлмӹлӓ», - Владимир Путин манын.

Мары Элӹн Глава Юрий Зайцев ти тема регионланат толкеш толмым пӓлемден.

Республикӹштӹ пӓшӓдӹмӹ эдем шот пиш изи – 0,25% (862 эдем). А ваканси – 7004. Тидӹ пӓшӓ кидвлӓн керӓлӹм яжон анжыкта.

Республика угӹц тымдымы дӓ у профессивлӓэш йӓмдӹлӹмӹ программывлӓм кычылтеш. 2025 ин «Активные меры содействия занятости» федеральный проект негӹцеш 412 эдем пиш керӓл профессивлӓэш тымень лӓктӹн.

25 профессиональный образовательный организациштӹ 19,6 тӹжем эдем 224 образовательный программа семӹнь тыменеш.

2025/2026 тыменьмӹ ин бюджетный вӓрӹшкӹ 3870 эдемӹм тыменяш пыртымы лишӓшлык, технический специальность доно – 54%. «Работа России» портал гач 159 договорым пингӹдемдӹмӹ.

Республикӹштӹ выпускниквлӓм пӓшӓшкӹ нӓлмӹ шотышты дӓ предприятивлӓ доно цаткыды кӹл улы. 2025 ин 3,8 тӹжем специалист тымень лӓктӹн, а нӹнӹ логӹц 98,4% пӓшӓм мон. 80% выпускник регионешок пӓшӓм ӹштӓш кодеш.

Кӹдӓлӓш профессиональный образованин 4 кластерӹм ӹштӹмӹ, колледж дон техникумвлӓ материально-технический монгыр гӹц яжоэмӹт, а промышленный предприятивлӓ учебный заведенивлӓ доно яжо кӹлӹм ӹштенӹт.

Мары Эл Республика Главан Администрацин пресс-службын отдел. «Жерӓ» №3 (10982), 16 январь 2025 ин.