Мары Элӹн Глава Юрий Зайцев – Кырык мары районышты

Мары Элӹштӹ АПК-лан кадрвлӓм сельхозпроизводительвлӓ доно иквӓреш йӓмдӹлӓт.

Мары Эл Республикӹн Глава Юрий Зайцев пӓшӓ доно Кырык мары районышты ылмыжы годым Микрӓк кӹдӓлӓш школышты «Цветоводство» дӓ «Агроинженерия» классвлӓм анжал лӓктӹн. Ти классвлӓштӹ агропромышленный комплекслӓн керӓл анзыкылашы специалиствлӓм йӓмдӹлӓш тӹнгӓлӹт. Техень тымдымаш лин кердшӹ манын, Микрӓк сола школышты 2025 ин «Молодежь и дети» дӓ «Технологическое обеспечение продовольственной безопасности» национальный проектвлӓ семӹнь уэмден тӧрлӹмӹ кого пӓшӓм ӹштӹмӹ, тидӹлӓн 161 миллион утла тӓнгӓм кычылтмы. Тидӹ районышты пӹтӓришӹ классвлӓ, кышты сола хозяйствылан специалиствлӓм школын парта логӹц веле агыл, а тетя сад гӹцок тымдаш тӹнгӓлӹт. Весӹ техень классан школ Пайскырыкышты лишӓшлык, кышты ремонт пӓшӓвлӓ тӹнгӓлӓлтӹнӹт.

Регионын Глава Микрӓк школышты специализированный классвлӓштӹ ӹштӹмӹ пӓшӓвлӓм кӱкшӹн ӓклен, тенгеок районын Микрӓк дӓ Пайскырык кымдем сельхозпроизводительвлӓн школ доно цаткыды кӹлӹштӹм яжо пример семӹнь пӓлемден.

«Сусу лимӹлӓ: «Агрорегион» компанин вуйлатышы, «Единая Россия» партин член, пуры пӓшӓм ӹштӹмӹ семӹнь школлан современный оборудованим нӓлӓш вӹц миллион утла тӓнгӓм пуэн. Яжо шанымашан техень тӹнгӓлтӹш верц ӹвӹртӹмӹлӓ», – Юрий Зайцев манын.

Поволжский государственный технологический университет доно иквӓреш тымдымаш шотышты соглашеним кым монгыр гӹц ӹштӹмӹ доно образоваништӹ преемственность лиэш. Школ, кышты 15 сола гӹц 127 ӹдӹр-ӹрвезӹ тыменеш, тенгеок «Агрорегионын» пилотный проектӹштӹ участвуя. Керӓл ти проект тенгеок сола ӹлӹмӓшӹн цилӓ семӹнь интересный дӓ яжо ылмыжым анжыктышашлык.

Регионын Глава тенгеок Микрӓк солаштышы «Усадьба» сельскохозяйственный потребительский кооперативӹм анжал лӓктӹн. Ти кооператив пай гӹц шукы йиш качкышым йӓмдӹлӓ. Предприяти государственный палшык пумы доно пӹсӹн виӓнгеш. Пытӓртӹш кок и лошты производствым уэмдӓш 25 миллион тӓнгӓм кычылтмы, тӹшец ӹндекш миллионжы – государствын палшык. Тишӓк у цехӹм пачмы дӓ у оборудованим нӓлмӹ. Тидӹн велдӹк качкаш ярал хӓдӹрвлӓм пӱлӓэш шукемдӹмӹ. 2025 ин 30 процентеш пайдажы шукемӹн, а бюджетӹшкӹ доход – 64 процентеш.

Специальный военный операци тӹнгӓлӓлтмӹ годшен кооператив СВО-н участниквлӓлӓн палшыкым 1,5 миллион утла тӓнгӓэш ӹштен, тӹ шотышты – оборудовани дон молым нӓлӓшӓт.

Аксай солашкы корны лиэш

Мары Элӹн Главан поручени доно ти солашкы корным тӧрлӓт лиэш. Пӓшӓ доно толмашты Юрий Зайцев Аксай солашты ӹлӹшӹвлӓ доно вӓшлиӓлтӹн. Корнын худажы гишӓн эдемвлӓ ик гӓнӓ агыл ядмашвлӓм сиренӹт дӓ хала якте кемӹ корным тӧрлӹктӓш ядыныт. Нӹнӹ дӓ «Единая Россия» партин представительвлӓжӹ доно иквӓреш ылмы годым Юрий Зайцев корнын керӓлжӹм лачокок пӓлемден.

«Ядмашда решӹмӹ лиэш, корным тӧрлӓт, вет тетявлӓ школышкы кыдалыштыт, медучрежденишкӹ каштмыла. Таманяр и корным вычымыкы, мӓ тӓмдӓн ӹнянӹмӓшдӓм ӹненӓ ямды», – регионын Глава манын.

Юрий Зайцев депутатвлӓлӓн корным тӧрлӹмӹ пӓшӓ ӹштӹмӹм тӹшлӓш ядын. Когосола кымдемӹн депутат, СВО-н участник Игорь Мурзаев тидӹм ӹшке вӹкӹжӹ нӓлӹн.

1,8 километрӓн корны 2026- 2028 ивлӓн уэмден тӧрлӹмӹ лишӓшлык, тидӹлӓн 26 миллион тӓнгӓ керӓл лиэш.

Мары Эл Республика Главан Администрацин пресс-службын отдел. «Жерӓ» №22 (11002), 5 июнь 2026 ин.