Мары Элӹн Главан кид гӹц – культура пӓшӓзӹвлӓлӓн наградывлӓ

Э.Сапаев лӹмеш Мары государственный академический опера дӓ балет театрышты торжественный мероприяти ылын, кыды Культура пӓшӓзӹвлӓн дӓ Театрын мир вӹлнӹшӹ кечӹвлӓ лӹмеш эртӓрӓлтӹн. Юрий Зайцев тенгеок Театр пӓшӓзӹвлӓн союзын 150 и ылмым пӓлдӹртен.

«Ти кок событи эдемӹн йӓнгжӹм тӓрвӓтӹшӹ, ӹшкӹмӹм кычен мыштымашеш тымдышы, а сек пӹтӓришӹ негӹцшӹ семняшты вазеш. Седӹндон тӓмдӓн миссидӓ – тымдаш, воспитываяш, вет семнян йӓнг пайдажы обществын цӹрежӹм анжыкта», – Юрий Зайцев пӓлемден.

Республикӹн Глава семнян цымыр дӓ ик йых дон весӹн кӹл «Семья» национальный проектӹштӹ ажедшӹ ылеш манын, кыдылан Президент шанымашым тӹнгӓл пуэн.

«Мӓ театрвлӓм, культура томавлӓм уэмден яжоэмденӓ. Кынам мӓмнӓн арми сӓндӓлӹкӹн суверенитет верц кредӓлеш, тӓ тӹ жепӹн сотым шӓредӓ, ум шанен лыктыда дӓ кымылым лӱктедӓ. Тӓ тымден миэдӓ, тӓ йӓнгӹм цеверемдедӓ, сценӹштӹ дӓ экранышты Родиным перегӹшӹвлӓн образым чангедӓ», – Юрий Зайцев манын.

Мары Элӹн Глава искусствым шачыктышывлӓлӓн таум келесен дӓ пӹтӹдӹмӹ йӓнг пайдалыкым, шулыкым дӓ керӓл роль дон проектвлӓлӓн шачаш согоньлен.

Вара регионын вуйлатышы наградывлӓм кычыктен миэн. Россий Федерацин Культура Министерствын Почетный грамотым Мары Эл Республикӹн Правительство Председательӹн Вашталтышыжы – культура, печать дӓ национальность пӓшӓ шотышты министр Константин Ивановлан пуэн. Тенгеок шукы артист кымылангдымы ылыныт.

Мары Эл Республика Главан Администрацин пресс-службын отдел. «Жерӓ» №14 (10993), 3 апрель 2026 ин.