Мары Элӹштӹ республикӹлӓн 105 им дӓ Халыквлӓн цымы- рын ӹлӹмӹ кечӹм пӓлемдӹмӹ
Э.Сапаев лӹмӓн театрышты торжественный мероприяти ылын. Республикӹн Глава Юрий Зайцев цилӓм празныквлӓ доно кымылангден. Мары Элӹн Глава Российӹн Президент Владимир Путинӹн халыквлӓн ӹзак-шоляк ганьы ӹлӹмӓшӹм сек кого виэш шотлымым ӓшӹндӓрен пуэн.
«Тенге ӹлӹмӓш мӓмнӓм историн цилӓ кого сӓрӓлтӹшӹштӹжӹ ытарен: наукышты, искусствышты, просвещеништӹ сӹнгӹмӓшвлӓ линӹт, Кокшы мировой вырсышты сӹнгӓш дӓ нацизмӹм шӓлӓтӓш палшен», - государствын Глава пӓлемден.
Юрий Зайцев юбилей кечеш республика у сӹнгӹмӓшвлӓм ӹштен манын. Национальный проектвлӓ велдӹк школ дон тетя садвлӓм уэмдӹмӹ, образовательно-производственный кластервлӓм пачмы, аэропортын терминалым ӹштӹмӹ, медицинӹн у учрежденивлӓ дӓ школвлӓ угӹц чангалтыт манын.
Мероприятиштӹ ылыныт: РФ Федеральный Собранин Федераци Советӹн Председательӹн заместитель Константин Косачев, Федераци Советӹн оборона дӓ безопасность Комитетӹн Председательӹн заместитель Сергей Мартынов дӓ РМЭ Государственный Собранин Председатель Михаил Васютин
Константин Косачев исторический опыт Россий халыклан такеш эртӹде манын, СВО ӹшке мӱлӓндӹнӓм угӹц цымыраш палша, Россий пиш кого держава, а халыквлӓжӹ тӹдӹм ӹшке кого томаэшӹштӹ шотлат манын.
Михаил Васютин Халыквлӓн цымырын ӹлӹмӹ кечӹ кого вим дӓ икышын ӹлӹмӹм анжыкта, а Республикӹн кечӹ мӓмнӓн мары мӱлӓндӹнӓм, культурынам, традицивлӓнӓм яратымым пӓлемдӓ манын.
Празныкым пӓлемдӹмӹ годым государственный наградывлӓм пӓшӓ доно лӹмлештӓлтшӹ эдемвлӓлӓн пумы: младший лейтенант Александр Кармаенков Суворовын медаль доно пӓлемдӓлтӹн; МарГУ-н профессор Наталья Морова – «Народный учитель Российской Федерации» лӹм доно; Мары Эл Республикӹн цифровой виӓнгмӓшӹн министр Венедикт Суворов – «Заслуженный работник связи и информации РФ» лӹм доно дӓ молат наградывлӓм кыченӹт.
Празнык кымылым республикӹн творческий коллективвлӓ ӹштенӹт. Анжышывлӓ мары халыкын паян культурыжым да шукы йиш традицижӹм сцена гӹц ужыныт. Йошкар-Олашты дӓ регионын культура томавлӓштӹ тематический выставка, йӓрмингӓ, концерт дӓ спортивный мероприятивлӓ эртӓрӓлтӹнӹт.
Мары Эл Республика Главан Администрацин пресс-службын отдел. «Жерӓ» №45 (10973), 14 ноябрь 2025 ин.