Мары Элӹштӹ ВРП (валовый региональный продукт) 2,3% кушкын

Мары Элӹн тӹнг капиталышкы инвестици 2025 ин 68,6 млрд тӓнгӓм эртӓрен, 13 % нӓрӹ когоэмӹн.

Экономикӹм анзыкы нӓнгешӹ тӹнг отрасльвлӓжӹ: электронный промышленность (+16,4%) дӓ преня дон хангам ярыктен ӹштӹмӓш (+9,7%). Экономикӹн пӓшӓжӹм иктешлӹмӹ дӓ анзыкылашеш планым Министерствын коллегин заседаништӹ ланзылымы. Тӹштӹ Мары Элӹн Глава участвуен, тӹнг доклад доно промышленность, экономический виӓнгмӓш дӓ торговльын министр Владимир Халюзин выступаен.

Тӹдӹ экономикӹн тӹнг показательвлӓн когоэммӹ гишӓн увертӓрен.

Пӹсӹ виӓнгмӓшӹм обрабатывайышы производство анжыктен, тӹдӹ промышленностьышты 93% утлам йӓшнӓ. Сек кого анзылтымаш инновационный направлеништӹ пӓлдӹрнен: электронный хӓдӹрвлӓм ӹштӹмӓш 16,4% кушкын, машинӓ дон оборудованим тӧрлӹмӓш – 10 процентеш.

9 инвестиционный проектӹм кычал колтымы дӓ АПК-н 11 производительлӓн 848 миллион тӓнгӓӓшӹм палшымы, 297 у пӓшӓ вӓрӹм пачмы, бюджет гӹц пасна 3 миллиард тӓнгӓӓш инвестицим кычылтмы, 689 миллион утла тӓнгӓ – налоговый дӓ неналоговый отчислени. Социально-экономический виӓнгмӓшӹн индивидуальный программым ӹлӹмӓшкӹ партымылан яжо ӓкӹм РФ-ын экономический виӓнгмӓшӹн министр Максим Решетников пуэн.

Кӹзӹт республикӹштӹ 126 инвестиционный проект семӹнь пӓшӓ кеӓ, цымыр ӓкшӹ 47,5 млрд тӓнгӓӓш.

Изирӓк бизнесӹн анзыкыла виӓнгмӹм пӓлемдӹмӹ. МСП сферӹштӹ пӓшӓлӹшӹ шот 10,7% кушкын дӓ тӹштӹ 116,6 тӹжем эдем шотлалтеш. Республикӹн Правительствын тӹнгӓлтӹш доно 2026 ин «Заслуженный предприниматель Республики Марий Эл» шотеш пиштӹмӹ лӹмӹм пуаш пингӹдемдӹмӹ.

Туристический отрасль кушкын мимӹм анжыктен: 2025 ин республикӹшкӹ 1,3 млн турист толын кен, 8% шукырак.

Газификаци доно кӱкшӹ цифрышкы шомы. Догазификаци семӹнь Мары Эл Российӹштӹ 1-шӹ вӓрӹм нӓлӹн: природный газ пычым 2 тӹжем утла тома якте шоктымы.

Заседанин пӓшӓм иктешлӹмӹ годым Юрий Зайцев техень темп гӹц валаш ак кел манын.

«Мӓмнӓн пӓшӓнӓ доно эдемвлӓн ӹлӹмӹ яжо йӧнвлӓштӹ, обществышты стабильный ӹлӹмӓш кӹлдӓлтӹт», - Мары Элӹн Глава пӓлемден.

2026 ин планышты ылыт: социально-экономический виӓнгмӓшӹн индивидуальный программывлӓм кычылтмаш, промышленный инфраструктурым ӹштӹмӓш, технопарквлӓм пачмаш, экспортым виӓнгдӹмӓш, СВО-н участник дон семнявлӓштӹлӓн предпринимательствым виӓнгдӹмӹ ярелӓ палшымаш.

Коллегин пӓшӓ мычашты наградывлӓ доно кымылангдымаш эртӓрӓлтӹн.

Мары Эл Республика Главан Администрацин пресс-службын отдел. «Жерӓ» №13 (10992), 27 март 2026 ин.