Мары парламентӹн спикер – пӓшӓ доно ӹшке избирательный округыштыжы

12 августын Мары Эл Республикӹн Государственный Собранин Председатель Михаил Васютин Кырык мары район дон Козьмодемьянскышты пӓшӓ доно ылын.

Кышкы тӹдӹ районышкы толмыжы йӹде соок кеӓ, тидӹ Микрӓк кӹдӓлӓш школ. Госсобранин Председатель анжалын, кыце школышты кого тӧрлӹмӓш пӓшӓвлӓ ӹштӓлтӹнӹт, а август мычашеш пӹтӹшӓшлык ылыт. Школым «Молодежь и дети» нацпроект семӹнь уэмден тӧрлӓт, кыце ти пӓшӓ кеӓ, Михаил Зиновьевич пӓлӹшӓшлык, вет 1 сентябрь якте кок ӓрня нӓрӹ веле кодын. Школышты 1991 ин тыменяш тӹнгӓлӹнӹт, 504 тыменьшӹлӓн стройымы ылын.

Ти кечӹвлӓ якте шукым ӹштӹмӹ, а кӹзӹтеш чиӓлтӹмӹ йиш пӓшӓвлӓ кодыныт. Школын кӧргӹжӹм цеверемдӓш кырык мары орнаментӹмӓт кычылтыт, пӓлӹмӓн, у амаса дон окнявлӓ лит, пырымы ӓнг дӓ кокшы этажын фойе цӹрештӹм вашталтат, у элктропроводкым шыпшыт, кудывичӓт у асфальтан лиэш.

Пӓшӓ вӓрӹштӹшӹ совещаним эртӓрӹмӓштӹ Кырык мары муниципальный район администрацин глава Наталья Арганякова дӓ школ вуйлатышы Людмиила Ефимова ылыныт. Подрядный организацин пӓшӓзӹвлӓ пӓшӓм жепӹштӹжӹ пӹтӓрен шоктымы гишӓн келесенӹт.

Республикӹн Госсобранин спикер пакылажы Виловат кыдӓлӓш школышты ылын, кышты школын левӓшӹм тӧрлӓт. Тенгеок классвлӓштӓт уэмден яжоэмдӹмӹ изирӓк пӓшӓвлӓ кеӓт, а 1 сентябреш тиштӓт цилӓ йӓмдӹ лишӓшлык.

Виловат солан стадионышты «Готов к труду и обороне» Всероссийский физкультурно-оздоровительный комплексӹн нормывлӓм сдаяш йӧнӹм ӹштӓт – тидӹлӓн площадкым йӓмдӹлӓт. Тӹдӹм торжественно пачмаш 16 августын эртӓрӓлтеш. Тӹнӓмок «Восславим землю Акпарса» XIХ кырык мары спорт фестиваль тӹнгӓлӓлтеш. Ти площадкым «Развитие физкультуры и массового спорта» федеральный программышкы ушнымы велдӹк ӹштӓш йӧн лин.

Наталья Арганякова, администрацин главан социальный ядмаш доно заместитель Наталия Мастерова дӓ физкультура дон спортым виӓнгдӹмӹ Кырык мары центрын вуйлатышы Геннадий Пичугин доно иквӓреш футбольный полелӓн сертификатым ӹштӹмӹ гишӓн ядмашым ланзыленӹт. Тенге вара регионышты дӓ регионвлӓ лошты футболла мадмашымат эртӓрӓш лиэш. Михаил Васютин ти ядмашым решӓш ӹшке тӹшлӓш сӧрен.

Яков Эшпай лӹмӓн Халык культурын центрӹштӹ Михаил Васютин «Собери ребёнка в школу» Всероссийский акци семӹнь, кыдым «Единая Россия» парти эртӓрӓ, шукы тетяӓн семня дӓ СВО-шты колышын семня доно вӓшлиӓлтӹн. Кырык мары муниципальный районын Глава Евгений Смелов дон Козьмодемьянск халан глава Игорь Волков доно иквӓреш нӹнӹ ти семнявлӓлӓн школышкы кешӓшлык хӓдӹрвлӓм подаренӹт.

Ти кечӹн 50 иӓш юбилейжӹм Кырык мары драма театрын тӹнг режиссер Ольга Искоскина пӓлемден. Госсобранин Председатель Михаил Васютин кымылангдымы шамаквлӓм келесен дӓ Госсрбранин Тау шамакым Мары Элӹн театр искусствым виӓнгдӹмӹ гишӓн кычыктен. Пуры шамаквлӓм келесӹмӓшкӹ Кырык мары муниципальный район администрацин лӹм доно тенгеок Наталия Мастерова дӓ культура отделым вуйлатышы Светлана Плахова ушненӹт.

Михаил Васютин тенгеок Козьмодемьянскын объектвлӓм анжал лӓктӹн, кышты тӧрлӹмӹ дӓ стройымы йиш пӓшӓвлӓ ӹштӓлтӹт: «Дарование» школ-интернатышты – столовыйышты, 1-шы № школышты окнявлӓм вашталтат дӓ «Бизнес-спринт (Я выбираю спорт)» федеральный программа семӹнь «умный» спортплощадкым ӹштӓт. Козьмодемьянскын хала библиотекӹштӓт вашталтмаш лишӓшлык – тӹдӹм модельный статусышкы ваштат. Советская дон Свердлова лӹмӓн ӧлицӓвлӓн вӓшлиӓлтмӹ вӓрӹштӹ тротуарым «Формирование комфортной городской среды» программа негӹцеш ӹштӓт. Горбунцовын паркышты дӓ Лихачев лӹмӓн ӧлицӓштӹ «Улицы старого Козьмодемьянска» проект семӹнь уэмден тӧрлӓт.

В.ЁЛКИН, С.ИЛЬИНА. «Жерӓ» №32 (10960), 15 август 2025 ин.