Республикӹн Главан кид гӹц – стипендиатвлӓлӓн дипломвлӓ

Конгрессвлӓн Дворецӹштӹ регионын Глава Юрий Зайцев ӹндекш дипломым пуэн, кўвлӓ аспирантурышты научно-педагогический кадрвлӓм йӓмдӹлӹмӹ программа семӹнь тыменьӹт.

«Мӓ Мары Элӹн сӓмӹрӹквлӓ логӹц сек яжовлӓм лӹмлештӓренӓ. Жеплӓн керӓл профессидӓ, пиш шотан образованидӓ анзыкылашы ӹлӹмӓштӹдӓ ӹнян негӹц лит. Тӓ цацен тыменьмӹдӓ, шукым пӓлӓш кымылан ылмыда доно пўлӓ анзыкыла кендӓ», - Юрий Зайцев пӓлемден.

Республикӹн Главан стипендин дипломвлӓм получаенӹт: МарГУ-н аспирантвлӓ Александра Аверина, Надежда Васильева, Екатерина Дождикова, Олеся Овчинникова дӓ Поволжский государственный технологический университетӹн аспирантвлӓ Алексей Дьячков, Никита Кухтенко, Анастасия Семёнова, Александра Солоницына, Галина Чернова.

Стипендиатвлӓн цымыр шотшы - 59, нӹнӹ логӹц 28 - кӹдӓлӓш профобразованин тыменьшӹвлӓ, 22 - кўшӹл образованин дӓ 9 - аспирантвлӓ.

Стипенди 1600 гӹц 3000 тӓнгӓ якте ылеш, тыменьмӹ и мычкы тўлӓлтеш. Бонусан лиӓш манын, «отлично» оценка 50 % лишӓшлык дӓ республиканский, всероссийский, международный олимпиада дон конкурсвлӓштӹ призер ӓль сӹнгӹшӹ лимӓш келеш. Аспирантвлӓлӓн келеш: авторский открыти, изобретени, научный статьявлӓ, экспериментальный пӓшӓштӹ участвуйымаш.

Юрий Зайцев наградым пумы годым Президент Владимир Путинӹн шамаквлӓжӹм келесен: «Активный, талантан эдемлӓн Россий – пиш яжо йӧнвлӓм кычылташ лимӹ сӓндӓлӹк. Тӹнгжӹ – ӹшкӹмӹм, виӓн ылметӹм пӓлдӹртӓш дӓ пакыла действуяш тӹнгӓлмӹлӓ, со анзыкыла веле кемӹлӓ». Регионын Глава тенгеок наставниквлӓлӓн таум келесен.

Мары Эл Республика Главан Администрацин пресс-службын отдел.. «Жерӓ» №42 (10970), 24 октябрь 2025 ин.