Юрий Зайцев Российӹн Герой Марк Евтюхинӹн ӓвӓжӹ доно вӓшлиӓлтӹн

Эргӹжӹм дӓ ӹзӓжӹм шотеш пиштен ӓштӹмӓш шанымаш доно Йошкар-Олашкы ӓвӓжӹ Лидия Ивановна дӓ шоляжы Игорь Николаевич толыныт.

«Комбат Марк Евтюхинӹн вуйлатымы десантниквлӓн подвигӹштӹ чеченский вырсы годым сек опасный бандым шагалташ палшен, тидӹлӓн вуйыштым пиштӓш вӓрештӹн – тидӹ историн лаштыкшы. Тидӹ пример тӹ ӹрвезӹвлӓлӓн, кӱвлӓ кӹзӹт Родиным перегӓт», – Юрий Зайцев манын.

Сӹнгӹмӓш бульварышты Российӹн Геройлан памятник-бюст доны пеледӹшвлӓм пиштӹмӹ церемони эртӓрӓлтӹн.

Лидия Евтюхина республикӹн Главалан Мары Элӹштӹ шукы техень мероприятим эртӓрӹмӹ гишӓн таум келесен: «Хоть-махань ӓвӓлӓн шергӹ, кынам тетяэт гишӓн ӓшӹндӓрӹмӓш перегӓлтеш. Тидӹ лиэш, мӓӓт ӹленӓ».

Йошкар-Олашты тенгеок Гагарин проспектӹштӹ мемориал ханга улы, 2019 ин ӧлицӓлӓн Евтюхинӹн лӹмжӹм пумы.

Марк Евтюхин Афганистанышты боевой действивлӓштӹ участвуен, Абхази дон Босништӹ – миротворческий миссиштӹ, 2000 ин – батальонжы доно Чечняшты. 2000 ин колымыжы паштек Российӹн Президентӹн Указ доно Россий Федерацин Герой лӹмӹм пумы.

Тене десантниквлӓн подвиглӓн 25 и лин. Владимир Путин ӹшке Лидия Евтюхиналан юбилей вир доно йӹнгӹртен. Геройын ӓвӓжӹ сӓндӓлӹкӹн Президентӹн техень шотеш пиштӹмӓшӹжӹ цилӓ ӓвӓлӓн пишок шергӹ манын, тӹдӹ эртӹшӹ событивлӓм техень тыргыж жепӹн ӓштӹмӓшӹжӹ доно цӱдейен.

«Техень вӓшлимӓшвлӓ мӓмнӓн айыртемӓлтшӹ халык ылмынам пӓлемдӓт, историм перегӓш палшат, сӓмӹрӹквлӓм тымдат», - Юрий Зайцев манын.

Мары Эл Республика Главан Администрацин пресс-службын отдел. «Жерӓ» №32 (10960), 15 август 2025 ин.