Ветеранвлӓ доно вӓшлимӓш
18 сентябрьын Кырык мары районын ветеранвлӓн советӹн членвлӓ вӓшлимӓшкӹ ӱжмӹ ылыныт. Район вуйлатышы дӓ администрацин эдемвлӓ доно иквӓреш погынымаш Ӹлӓлшӹ эдемвлӓн празньык шомы годым традицишкӹ пырен.
Петрова Т.В., ветеранвлӓн районный советӹн председатель, вӓшлимӓшкӹ властьын тӹ ответственный лицӓвлӓм шӱден ылын, кӱвлӓ районын мӹндӹр вӓржӹ гӹц толшывлӓн ядмашвлӓэшӹштӹ тӹрӹс дӓ келгӹ вӓшештӹшӹм пуэн кердӹт.
Я.Эшпай лӹмӓн ЦНК-шты погынымашты ылыныт: Смелов Е.В. – Кырык мары муниципальный районын глава, депутатвлӓн районный собранин председатель, «Единая Россия» партин местный отделенин секретарь; Родионов М.Ю – Мары Элӹн Государственный собранин депутат, «Газпром межрегионгаз Йошкар-Ола» Козьмодемьянск филиалын директор; Мастерова Н.К. – социальный ядмашвлӓ доно администрацин главан заместитель; Смирнова Р.В. – «Комплексный центр социального обслуживания населения в Горномарийском районе» ГБУ-н директор; Криворотова О.В. – «Центр предоставления мер социальной поддержки населению в Горномарийском районе» ГКУ-н вуйлатышы; Ёлкин В.М. – администрацин образовани отделын сӓмӹрӹквлӓ доно пӓшӓм ӹштӹшӹ секцин вуйлатышы, «Край горномарийский» газетӹн корреспондент.
Пӹтӓриок Тамара Викентьевна районын шотеш пиштӹмӹ ветеранвлӓм толшаш айо доно кымылангден, цӓшӹм дӓ анзыкыжымат активный ӹлӹмӓш доно курымым эртӓрӓш согоньлен, а вара погынымашты анжымы ядмашвлӓ доно пӓлӹмӹм ӹштен.
Евгений Валериановичлӓн шамакым пумыкы, тӹдӓт ӱжмӹ эдемвлӓм айо доно кымылангден дӓ ядмашвлӓэш вӓшештен. Ик ядмашым Э. С. Таникова пуэн, кыдым Митрисолашты автобусым вычымы вӓр уке ылмаш тыргыжландара. Тенгеок эче ядмашыжы клубым кынам тӧрлӓш тӹнгӓлмӹ доно кӹлдӓлтӹн. Иктешӹжӓт ӹвӹртӓрӹшӹ вӓшештӹш ылде – окса бюджетӹштӹ ак ситӹ, фермервлӓ доно кӹлӹм ӹштӓш цацымыла, местный инициатива программымат шотышкы нӓлмӹлӓ.
Кулаковы солашты Культура учрежденим уэмден тӧрлӹмӹ гишӓн ядмашеш ынгылдарымашат кужын шыпшылтын, кышак Смелов Е.В. дон Мастерова Н.К. вӓшештенӹт, но ДК-шты мероприятивлӓм эртӓрӓш дӓ концертвлӓм анжаш икманяр жеп эче вычымыла маныныт.
Советӹн заседани годым Е.В.Смелов мӓмнӓм ик патыр эдем, школышты тыменьмӹ годшы тӓнгжӹ доно пӓлӹмӹм ӹштен, кыды туан Кырык сиржӹ гӹц ӧрдӹжтӹ ылеш гӹнят, курымжы мычкы шачмы вӓржӹм перегӹмӓштӹ участвуен. Тидӹ Василий Николаевич Мельников – Россий Вооруженный Вин ветеранжы, Тӹрӹнь Йӓктерлӓэш (Пикузино) шачшы, а кӹзӹт Москва областьын Кубинка халашты ӹлӓ, Россий ВКСӹн подразделеништӹ инспекци группын вуйлатышы ылеш. 18 иӓшӹн туан солажы гӹц кемӹ годшен салтак дӓ офицер, кого должностьвлӓштӹ СССР дӓ Российӹн армиштӹ служен, истори наукын кандидат Хабаровскышты школын вуйлатышат ылын.
Пӓшӓн ветеранвлӓ ядмашымат тӹдӹлӓн пуэнӹт, а Ангелина Павловна Асланова тенге манын: «Кырык мары районешнӓ техень эдемвлӓ шачмы доно когоэшненӓ».
Родионов М.Ю. ӹшке отрасльыштыжы пӓшӓзӹ эдемвлӓ ак ситеп, а газификаци пӓшӓ районышты яжон кеӓ манын. Мастерова Н.К. тенгеок толшаш айо доно кымылангден, а угӹц ӹштӓлтшӹ комиссишкӹ, кыды лӹмлӹ кырык мары эдемвлӓн лӹмӹштӹм шотеш пиштен перегӓш манын, махань-шон кого пӓлӹкӹм ӹштӹмӹм анжаш тӹнгӓлеш, тӹшкӹ Т.В.Петровам пырташ келесен. Пӹтӓришӹ, кӱн лӹмжӹм Виловат ЦМДК-лан пуаш шанымашым увертӓрӹмӹ, тидӹ А.Я.Сосновын лӹмжӹ ылеш.
Криворотова О.В. дӓ Смирнова Р.В. ӹлӓлшӹ эдемвлӓлӓн, СВО-н участниквлӓлӓн, тенгеок тетяӓн семнявлӓлӓн у йиш палшыквлӓ гишӓн шайыштыныт, тидӹвлӓ шотышкы пырат: кым иӓш тетявлӓм куштышы семнявлӓлӓн нӹнӹн ядмы доно лӹмӹн анжышы эдемӹм (социальная няня) токы шӱдӓш лиэш. Эче тишкевек якте ылдымы палшык улы: «Семья» нацпроект семӹнь тӓр тӱлӹдеок (на прокат) пел иэш коляскым, кроватьым дӓ матрасшым, изи стӧлӹм дӓ молы техеньӹм прокат пункт гӹц кандаш лиэш. Тидӹжӹ моло пиш яжо палшымаш! Техеньӹжӹ гишӓн кӹзӹтшӹ ӹлӓлшӹ эдемвлӓ омынешӓт ужын кердделыт – тетявлӓм кушташ пиш нелӹ жепвлӓ ылыныт, кынам такеш агыл, нӓлӓшӹжӓт оксажат, хӓдӹржӓт сола лапкавлӓштӹ ылде. Ядмаш ӹлӓлшӹ ветеранвлӓм урдымы томавлӓ гишӓн ылын. Тишӓк вӓшештӹшӹм ик семӹньжӹ пиш яжом келесӹмӹ: ӹшке туан эдемвлӓм тетя дон ыныкавлӓштӹ ӹшкеок семняштӹштӹ урдышашлык ылыт, нӹнӹлӓн палшаш ик йӧнӹм пыртымы – «система долговременного ухода».
Ёлкин В.М. сӓмӹрӹквлӓм патриот семӹнь тымдышы общественный организаци дон учрежденивлӓ, у йиш мероприятивлӓ гишӓн шайыштын, а пӓшӓн ветеранвлӓм ти тымдымашты кердмӹ семӹнь участвуяш ядын.
Ветеранвлӓн советӹн ик ядмашыжы логӹцӹштӹ иктӹм республика лӹм доно Ӹлӓлшӹ эдемвлӓн айо кечӹн кымылангдаш айыраш ылын, тӹ лӹмӹмӓт икышын келесенӹт. А 2 дон 3 октябрьын Озерка дон Козьмодемьянскышты айо лӹмеш мероприятивлӓ эртӓрӓлтӹт, тенгеок – сола кымдемвлӓн Культура томавлӓштӹ.
Газетӹм лыдшы тӓнгвлӓнӓ, тӓӓт айо гӹц ӧрдӹжеш идӓ код, лимӹ семӹнь кымылдам лӱктӓлӓш йӓл сага ушныда. Толшаш празньык доно!
Светлана ИЛЬИНА. «Жерӓ» №38 (10966), 26 сентябрь 2025 ин.