Айовлӓ лӹмеш кого йӓрмингӓ
1 ноябрьын Я.Эшпай лӹмӓн Халык культура центрӹштӹ Кырык мары районын кого празныкым лӹмлӹ кым событи лӹмеш эртӓрӹмӹ: Халыквлӓн цымырын ӹлӹмӹ кечӹ, Мары Эл Республикӹлӓн 105 и дӓ Сола хозяйство дон перерабатывайышы промышленностьын кечӹ. Ти событивлӓм пӓлемдӹмӓш молнамат кымдан эртӓрӓлтӹн ылын, а ти гӓнӓ «Кырык мары мӱлӓндӹн пайдажы» («Дары земли горномарийской») палшыкым ӹштӹмӹ (благотворительный) йӓрмингӓ семӹнь цымырымы. Кырык мары районын каждый кымдемжӹ гӹц халык йӓрмингӓштӹ участвуен.
Тенгеок районын общеобразовательный школвлӓ яжон йӓмдӹлӓлтӹнӹт, паян выставкым анжыктенӹт дӓ пӱлӓ оксаэш качмы хӓдӹрвлӓштӹм техень школвлӓ выжаленӹт: Кулаковы, Пӹзӹкныр, Микрӓк, Когосола кӹдӓлӓш школвлӓ, Пистерлӓ тӹнг школ, Виловат «Петушок» тетя сад.
Пуры палшыкым ӹштӹмӓшкӹ тенгеок ушненӹт: Мары Эл Республикӹн Государственный Собранин Председатель Михаил Васютин, РМЭ Госсобранин депутат Михаил Родионов, РМЭ-н сола хозяйство дӓ продовольствин министр Павел Раевский, Кырык мары муниципальный районын глава Евгений Смелов, Кырык мары муниципальный район администрацин глава Наталья Арганякова, главан заместитель, администраци аппаратым вуйлатышы Светлана Киселева, администраци главан социальный ядмашвлӓ доно заместитель Наталия Мастерова, администрацин сола хозяйство дӓ природопользовани отдел вуйлатышы Геннадий Лаврентьев, администрацин молы пӓшӓзӹвлӓ дӓ сола кымдемвлӓн депутатвлӓ.
Керӓл шанымаш доно эртӓрӹмӹ йӓрмингӓ годым выжалымы окса 37 973 тӓнгӓ погынен, кыдым специальный военный операциштӹ участвуйышы мӓмнӓн земляквлӓлӓннӓ гуманитарный палшык семӹнь колтымы лиэш. Йӓрмингӓ анжыктен: СВО-шты кредӓлшӹ эргӹвлӓлӓн, марывлӓлӓн дӓ пашкудывлӓлӓн палшымаш – тидӹ районышты ӹлӹшӹ каждый эдемӹн делажы. Тидӹ Сӹнгӹмӓш верц цымыр пӓшӓнӓ!
Тидӹ празныквлӓн кого программын пӹтӓришӹ лаштыкшы ылын.
Кокшеш «Сила единства: наследие, труд и будущее Марий Эл» торжественный концертӹм эртӓрӹмӹ.
Пӹтӓриок и мычкы мӱлӓндӹ пӓшӓм ӹштӹшӹ дӓ вольык куштышы сола пӓшӓзӹвлӓм, тенгеок гуманитарный палшыкым ӹштен мишӹвлӓм кого мероприятиштӹ кымылангдымы – нӹнӹм шотеш пиштен, наградывлӓм кычыктенӹт: Государственный Собранин Председатель Михаил Васютин, депутат Михаил Родионов, РМЭ-н сола хозяйство дӓ продовольствин министр Павел Раевский, Кырык мары муниципальный район администрацин глава Наталья Арганякова, социальный ядмашвлӓ доно заместительжӹ Наталия Мастерова.
Кырык мары районын цилӓ сола хозяйствын киндӹ лӓктӹшӹжӹм иктешлӹмӹкӹ, тидӹм пӓлемдӹмӹлӓ: 24 тӹжем утла тонн киндӹм тӹред нӓлмӹ, тидӹ имешшӹ урожай доно тӓнгӓштӓрӹмӓштӹ вӹц тӹжем тоннеш шукырак погынен. Киндӹ лӓктӹш тене 32,8 ц/га ылеш, имештӹ – 28,1 ц/га.
Я.Эшпай лӹмӓн ЦНК-шты нӹнӹн кымылым шукы творческий коллектив яжо мыры дӓ пӹсӹ куштымашвлӓ доно сусуэмден: «Фантазия» вокальный ансамбль, «Топотушки» халык куштышы ансамбль, «Мистерия» хореографический студи, «Восток» шоубалет, «Шанс» театральный студи, «Лира» мырышы ансамбль, «Изи шӹдӹрвлӓ» мырышы студи.
Кырык мары районын творческий коллективвлӓ логӹц Кулаковын мырызывлӓ, Йоласал культура дӓ кид пӓшӓ пӧртӹн сотрудниквлӓ участвуенӹт. Йоласалвлӓ: Тятюкова Н.П., Емельянова С.М., Тихомирова Н.А. дӓ Страхова С.Е.– кид пӓшӓн цевер хӓдӹрвлӓштӹм, тенгеок тӹрлӓш дӓ украшенивлӓм ӹштӓш тымдымы мастер-классым анжыктенӹт. А фольклор ансамбль Пӓшӓ куштымашым пиш яжон куштен пуэн.
Паян наслединӓ, пӓшӓ дӓ анзыкылашына – икышын ӹлӹмӓшнӓн вижӹ!
Светлана ИЛЬИНА. «Жерӓ» №44 (10972), 7 ноябрь 2025 ин.