Мары телевиденилӓн – 65 и
Республикӹн Глава пӓшӓ доно ВГТРК региональный департаментӹн вуйлатышы – Генеральный директорын заместитель Рифат Сабитов дӓ ВГТРК-н икманяр филиалын вуйлатышывлӓ доно вӓшлиӓлтӹн. Нӹнӹ Мары Элӹштӹ телевизионный передачывлӓ тӹнгӓлмӹлӓн 65 им пӓлемдӓш толыныт.
«Ирок йӹде «Россия 1» телеканалым анжем, кечӹ мычкы - Россия 24.
ГТРК «Марий Эл» регионын ӹлӹмӓшӹм кымдан анжыкта. Мӓмнӓн республикӹштӹ шукы наци келшен ӹлӓ. Тиштӹ «Марий Эл» ГТРК кого пӓшӓм ӹштӓ. Пакылаат кӹл виӓнгмӹлӓн ӹнянем», - Юрий Зайцев манын.
Рифат Сабитов ВГТРК холдингӹн Генеральный директор Олег Добродеев гӹц кымылангдымы шамаквлӓм келесен: «Республикӹм яжон пӓлем. Халыквлӓн шукы йӹлмӹ доно передачывлӓм анжыктымаш кого сӓндӓлӹкнӓн культура дон духовно-нравственный пайдалыкым перегӓш палша. Тагачы тидӹ пишок керӓл. Кӹзӹтшӹ технологивлӓ лач «Марий Эл» ГТРКшты пыртымы ылыт. Коллективлӓн таум келесем, сек шукын «Вести. Местное время» программым анжат, вет ӹшке донышы гишӓн яжон пӓлӹмӹ шоэш. Улы Российлӓн анжыктышашлык тӓмдӓн тамаат улы, республика виӓнгмӹм ужам, паснаок туризм сферӹштӹ. Тӓмдӓн цевер пӧрттӱ дӓ паян культура».
«Марий Эл» ГТРК виӓн ылеш, нӹл йӹлмӹ доно передачывлӓ кеӓт, 99,8% аудиторилӓн техень каналвлӓ, платформывлӓ, сайтвлӓ, соцсетьвлӓ ситӓрӓт: «Россия 1» дӓ «Россия 24», «СМОТРИМ», ГТРК «Марий Эл» сайт, ВКонтакте, Одноклассники дӓ «Вести Марий Эл» канал, Телеграм.
Тележурналиствлӓн пӓшӓштӹлӓн ик гӓнӓ агыл наградывлӓм российский дӓ международный конкурс дон фестивальвлӓштӹ пумы.
«Марий Эл» ГТРК республикӹштӹ ӹлӹшӹвлӓлӓн нацпроектвлӓм кычылтмы, айырымаш кампани кемӹ гишӓн, регион дон сӓндӓлӹкӹн керӓл событивлӓ, Кого Сӹнгӹмӓшлӓн 80 и тема, специальный военный операцин кемӹ гишӓн, сӓмӹрӹквлӓлӓн эртӓрӹмӹ программывлӓ, мары халыкын празньыквлӓ дӓ молы шукы гишӓн увертӓрӓ.
Мары Эл Республика Главан Администрацин пресс-службын отдел. «Жерӓ» №33 (10961), 22 август 2025 ин.