Микрӓк млоец – сек пӹсӹ
Журналист пӓшӓэм видӹмем лошты дӓ тӓнгӓшӹмӓшвлӓ годым кырык марын студентвлӓ донат вӓшликӓленӓм. Нӹнӹ логӹц икманярын корным Шавашарыш кыченӹт. Суасламары госуниверситетӹн медицинский факультетӹштӹ Виловат велвлӓ, кок ӹдӹр Яштуга гӹц дӓ иктӹ Кулаковы гӹц сакой специальностян врачеш тымень лӓктӹнӹт дӓ Шавашарешок пӓшӓлӓш кодыныт. Ядмаш лӓктеш: малын районнан больницӹвлӓшкӹ, шачмы вӓрӹшкӹ, толделыт? Тӹштӹ пӓшӓдӓрӹм когоракым тӱлӓт ӓль Кырык сирӹш толаш райбольница гӹц ӱжмӓш ылде ма? Кыце пӓлем, врачвлӓ районланнаат керӓл ылыт.
Кӹзӹтӓт кырык марын студентвлӓ Шавашарышты тыменьӹт. Теве Микрӓк гӹц фермер Александр Петрович Филипповын йиш гӹц Карина ӹдӹрӹштӹ дӓ Антон эргӹштӹ – юристеш.
16-шы августын кырык марынвлӓн 19-шӹ спорт фестивальышты Виловат стадионышты 100 метр кытым кыргыжаш йӓмдӹлӓлтшӹвлӓ лошты кӱкшӹ кӓпӓн ик ӹрвезӹм цаклышым. Иктӹвлӓ, весӹвлӓ стартыш лӓктӹт, кыдыжы дистанцим 13 секунд нӓрӹштӹ эртӓт. Кӱкшӹ кӓпӓн млоец, йӓлӹм анзылтен, – 11,79 секундышты, сек яжо результат. Спринтер семӹнь тӹдӹн верц сусу лим.
Пӓлӹмӹ линӓ: Микрӓк млоец Антон Филиппов Шавашарышты, университетӹштӹ, юристеш тыменеш. Анжок, кӓпшӹн кытшы – 1 метр дӓ 88 см, яштака. Дистанцим, ялым кӱш лӱктӓлӹн, кужы ашкылвлӓм ӹштен, йоштке пӹсӹн кыргыжы. Шаналтышым: «Вот лачокшы спринтер!»
– Микрӓк школышты куштылгы атлетика доно кӹлӹм кыченӓт ма? – ядым.
Тӹдӹ келесӹш: – Футболла, волейболла мадынна, физкультурым тымдышы Моисей Яшмолкин мӓмнӓм тӓнгӓшӹмӓшвлӓшкӹ шыпшедӹлӹн. Куштылгы атлетика доно кӹзӹт ӹшке вуя занимаялтам, 100 метрӓн дистанциштӹ спорт мастерӹш кандидат нормым анжыкташ шанем.
Цель улы – тӹшкӹ шоаш веле келеш. Спринтер семӹнь Антонлан согоньвлӓм пушым, тренер доно кӹлӹм кычаш келесӹшӹм.
Сӓмӹрӹкем годым, тренируялтдеок, манаш лиэш, Пӹзӹкнырышты районнан тӓнгӓшӹмӓш годым рок мычкок 100 м 11,2 секундышты эртӹшӹм, Йошкар-Олашкы районна верц ГТО доно кемӹкем, «Дружба» стадионын шлакан дистанци мычкы шукы гӓнӓ 11,5 секундышты кыргыжынам, областной «Урожай» ДСО-н чемпионат линӓм. Тевеш, кӹзӹтӓт спорт ветеранвлӓ лошты стартыш лӓктӓм.
Келесем: спринтерлӓн 100 метр кытышты старт гӹц пиш чӹнь чымалтен, кидвлӓм нер докыла лӱктӓлӹн лӓкмӹлӓ – тенге 30 метр нӓрӹм. Тидӹ «кенгуру» йӧн маналтеш. Кенгуру когон чымалта, скоростьым когоэмдӓ – тенгеок спринтер ӹштӹшӓшлык. Кодшы 70 метрӹштӹ – «велосипед» йӧн доно, ялвлӓм пӹсӹн аравала сӓртӓш келеш. Тренировкышты тел жепӹн штанга доно, эче мышцым шыпшмы сакой упражненивлӓм ӹштӹмӹлӓ. Манежӹштӹ ӓль стадионышты 100, 150, 400 м скорость доно икманяр пачаш тӧр вӓрӹштӹ, эче кырык кӱшкӹлӓ (пасерӓкӹштӹ) кыргыжталмыла. Старт гӹц чӹнь лӓктӓш – 30 метрӹм икманяр гӓнӓ. Скакалка доно тӹргештӹлмӹлӓ дӓ молымат ӹштӹмӹлӓ – цилӓ наука семӹнь, кыргыжмы техникӹм яжоэмдӹмӹлӓ. Цилӓ пӓлӓш спортсекцишкӹ кемӹлӓ – тидӹм ӹштӓш тренер палшен кердеш.
Ӹнянӹн келесем: кырык марын Микрӓк солан 19 иӓш спринтер Антон Филиппов природын талант ылеш, тидӹжӹм пакыла тренировка доно цаткыдемдӹмӹлӓ, пӹсемдӹмӹлӓ. 11 секунд гӹц лӓктӹн, кандидат дӓ спортын мастер лин кердеш.
Ах, кыце эче тӹдӹ волейболла яжон мадеш! Тиштӓт ял цаткыдемеш. Тӹргештен кузен, мячӹм пыт севӓлеш, тенге Антон Микрӓк пӱэргӹвлӓн командылан очкавлӓм кандыш, озеркавлӓм сӹнгевӹ, икшӹ вӓрӹм нӓлевӹ.
Кырык марынвлӓн спорт фествиальыш микрӓквлӓ ӹшке вуя, ӹшке автомашинӓ доно толыныт. Микрӓк сола кымдем администрацин специалиствлӓ Виловатыш толаш командым погыделыт, тенгеок – Усола дон Эмӓнсола гӹцӓт, а Озерка гӹц Йыл агч пӱэргӹвлӓн, ӹдӹрӓмӓшвлӓн команда доно толыныт.
Талантан спортсменвлӓ дӓ спорт шӱмӓнвлӓм цилӓ вӓре моаш лиэш. Нӹнӹм пӓлӓш манын, школвлӓ дӓ сола кымдемвлӓ лошты кросс, фестиваль гӹц пасна, и йӹде куштылгы атлетика доно Кырык мары районын чемпионатым эртӓрӹмӹлӓ. Вара Антон Филиппов гань вес спортсменвлӓмӓт пӓлӓш лиэш.
И.ЛОБАНОВ. «Жерӓ» №33 (10961), 22 август 2025 ин.