Социальный политикӹн ядмашвлӓм раскыдемдӹмӹ

«Социальный маршрут. Мобильный сенатор» проект семӹнь Мары Элӹшкӹ Федераци Советӹн делегаци толын.

Сенаторвлӓ «Защитники Отечества» фондын филиалын пӓшӓжӹ доно пӓлӹмӹ линӹт, Ледовый Дворцӹштӹ «Ратник» следж-хоккей командын тренировкым, медицинский учрежденивлӓн пӓшӓм, инфекционный корпус чангалтмым анжалыныт, «Онкопатруль» информационно-просветительский проектӹн мероприятиштӹ участвуенӹт, протезно-ортопедический предприятиштӹ дӓ занятость Республиканский центрӹштӹ ылыныт.

Пӓшӓ доно толмы велдӹк социальный сферӹштӹ государственный политикӹн ядмашвлӓм совещаништӹ ланзылымы. Совещаништӹ Константин Косачев дӓ молы сенатор ылыныт.

Юрий Зайцев сенаторвлӓн палшымаш дӓ Федераци Советӹн Председатель Валентина Матвиенкон вниманижӹ республикӹн виӓнгмӓшлӓн яжо ориентир ылеш манын.

Константин Косачевын шамаквлӓ семӹнь, Мары Эл кого субъект агыл, седӹндон федеральный центр гӹц внимани айыртемӹн келеш манын. Парламентарий перинатальный центрӹм РФ-шты ик сек современный манын.

Совещаништӹ шукы ядмашым тӓрвӓтӹмӹ: социально-экономический сферӹштӹ государственный политика, специальный военный операцин участниквлӓлӓн палшымаш, республикӹштӹ демографический политика, «Продолжительная и активная жизнь» национальный проектӹн «Онкопатруль» проектӹштӹ участвуйымаш.

Мары Эл Республика Главан Администрацин пресс-службын отдел. «Жерӓ» №18 (10997), 30 апрель 2026 ин.