Яжо пӓшӓзӹвлӓлӓн – государственный наградывлӓ

Образоваништӹ, журналистикӹштӹ, культурышты, здравоохранеништӹ, строительствышты дӓ молы сферӹштӓт кого кӱкшӹцӹшкӹ шошы эдемвлӓлӓн Юрий Зайцев Россий Федерацин дӓ Мары Эл Республикӹн наградывлӓм кычыктен.

Юрий Зайцев нӹнӹ анзылны тидӹ керӓл событи ылеш манын.

«Тӓ лоштыда каждыйжы ӹшке семӹньжӹ Шачмы сӓндӓлӹклӓнжӹ, республикӹлӓн дӓ халыкланжы служа. Мӓ анзылнына кӹзӹт куштылгы агыл задачывлӓ шалгат, седӹндон икышын ылмаш дӓ палшымаш керӓл ылыт. Тӓмдӓм пӓшӓдӓ гишӓн кымылангдымаш кӹзӹт сек тӧр шанымаш ылеш. Ти наградывлӓ, мӹнь шанымаштем, у анзылтымашвлӓлӓн кымылым лӱктӹшӹ лит», – Юрий Зайцев манын.

РФ Президентӹн Указ доно «Заслуженный журналист Российской Федерации» шотеш пиштӹмӹ лӹмӹм (Почетное звание) «Союз журналистов России» региональный общественный организацин член Александр Климовлан пумы, «Заслуженный лесовод Российской Федерации» – Куяр лесничествын участковый лесничий Виктор Воронковлан, «Заслуженный работник высшей школы РФ» – «Марийский государственный университет» ВО ФГБОУ-н кафедрын профессор Татьяна Золотовалан, «Заслуженный работник культуры РФ» – Волжский районын Помар Культура томан халык творчествын методист Тамара Яранцевалан.

«Заслуженный работник образования РМЭ» шотеш пиштӹмӹ лӹмӹм шукы тымдышылан пумы.

«105-летие образования Республики Марий Эл» памятный медаль доно Андрей Желудкин, «Паллада» парусный клубын вуйлатышы, пӓлемдӓлтӹн.

Мары Эл Республика Главан Администрацин пресс-службын отдел. «Жерӓ» №14 (10993), 3 апрель 2026 ин.